domingo, 29 de abril de 2007

29-04-2007 Foz de Moñacos

BUERES-NIEVES-C.LLAGU OVIA-FOZ DE MOÑACOS-LA PESANCA-RIOFABAR


Güey paramos a desayunar na Pola Llaviana, cuesta trabayu salir de la pastelería, somos 27 y 9 güajes (no falamos de mentalidá), colamos pa Bueres pasando enantes por Orlé, dalgún problema de orientación col autocar. Definitivamente'n Bueres (680) posamonos, tovía con algo de modorra, el día ta atristayau, caleyamos carretera arriba hasta Nieves (750), seguimos pol mayau la Texera (960) pol píndiu y empedráu camin, la borrina cala nos güesos, hay que abrigase, tamos llegando al collau Llagu Ovia (1265) y la altitud notase nel termómetru.

Apenes se güeya na, el picu dexamoslu pa otra ocasión.
Baxamos poles Calzaes hasta la Braña Nueva (1200) y el mayau la Felguerina (1170) onde ta aposentau'n horripilante refuxiu de cazaores.
Seguimos pola espesura dela biesca, el terren ta húmedu y los resbalones son frecuentes, tos tienen ocasión de reise d'alguien, ¿tu no cayisté? ¿tas segura/u? enhorabuena.
Llegamos a les foces, onde xintamos lo que buenamente poemos, hay una campera bien guapa y un riachuelo pa enfríar el vino.


En acabando de xintar, doime un bañín, involuntariu, la verdá apenes llegue a tocar el agua, que fría taba, non se río naide,naide lo vio, extrañavense al veme retorcer los calcetos, dalguna quería que repitierá la caída, pero segundes partes nunca fuerón bones.



Pasamos la Foz, y pol monte Moñacos abaxo, pol camín carreteru bien conservau, en amena charla, solo interrumpia pa facer semeyes a los árboles, semeyes al ríu, semeyes al agua y a dalgún q'otru animal de dos pates.
Pasamos por delantre del área recreativa de la Pesanca (410) y por carretera llegamos a Riofabar, onde esperen los meniskinos xugando nel prau.
Una xornada más en la que recorrimos 17 km. con 6oom.

lunes, 9 de abril de 2007

09-04-2007 Peña Mediudía

LA FERRERA-PEÑA MEDIUDIA-BOROÑES

Güey toca facer semeyes pola zona'l Condao, voy con Isidoro, dexamos'l coche na Ferrera, y comincipíamos a caleyar, vamos subiendo por un camín anchu y encontríando paisanos que me tomen por llocu, por sacar semeyes a los praos y les flores, Isidoro dayos la razón, diz que ta perdiendo de trabayar por acompañame, que soy peor que los madrileños, al final confieso ser un señoritu d'Uvieu, queén tos más tranquilos.
Damos una bona vuelta, xintamos na biesca al llau d'un arroyu, el día ye calurosu, non se ve ninguna ñube.
Allegamonos a la Peña, vamos por encima la tubería que lleva'l agua pa Xixón, crucíamos la Peña pal otru llau y baxamos pola tubería (per la parte fuera), pasamos por un castañeu y con vistes al roble más grande que vi nunca, llegamos a Boroñes, onde nos presten un coche pa subir hasta la Ferrera a pol otru, les engüeñes non facíen apetecible la pindia carretera.

Una excursión con un final perfeutu, llástima que la madre de Isidoro no te al final de toes les excursiones.


viernes, 6 de abril de 2007

06-04-2007 Peña Mayor

FUENSANTA-MAYAU PASTOR-LES PRAERES-PEÑA MAYOR-FOCES DEL PENDON-FUENSANTA
Güey vamos colos Meniskinos, encontríamonos en Nava, nuna sidrería anque sea tomando café, colamos pa Fuensanta, famosa pol so agua, y no como añeju balneariu. Comencipíamos a caleyar, la pista ye pindía y los meniskinos imponen el so ritmu, el día ye soleau y ta caluroso, enseguía llegamos a les Praeres, llugar máxicu onde una pista pon el llímite a la incivilización, xintamos y tomamos un café nel rufuxiu,mesón,tasca,chigre (to nuno), la diferencia llumínica fai que dalgún meniskin (nun recuerdo quién) se de una buena ostia.


Agora somos ya pocos los que queamos, los meniskinos y dalgún mayor ya tirarón pa baxo, Victor, Josito, Ana P. Cundi y Jorge S. decidimos seguir, el ritmu faise vivu, demasiao vivu, llegamos al cumal de Peña Mayor, onde hay un de los buzones más güapos que güeyo nunca el que ta narrando esta hestoria.

El día ya se tornó gris, hay algo de barro, y dalguna que otra culada que fai que los pantalones se tornen como'l día. De nuevo nes Praeres (enllenes de coches) decidimos baxar poles Foces del Pendón, hay agua abondo, lo que les fai espectáculares.
El día faise llargu, pensando que lo que comencipío como un paseu, tornose nuna bona xornada de montaña.
Llegamos a los coches y vamos hasta Piloñeta, onde ta'l restu la comanda.
Tomamos dalgún brebaxe y despedímonos hasta la siguiente.
Un abrazu.