30-07-2008 Maciedome

PENDONES-PANDEVILLA-COLLAU LLAGU-MACIEDOME-RECUENCU-PENDONES

A les 8.00 paso por Uvieu a recoxer a Juan Carlos, Manolo y Bernardo, paramos en Rosecu, tomamos un café mentanto lleguen Alberto y Riestra.
En Campu Casu mercamos el pan, ya en Pendones (760) dexamos los coches.

Cuando entamamos a caleyar son les 9.50, la temperatura ta propicia pa facer exerciciu. Baxamos hasta'l ríu y d'aquí p'alantre to cuesta riba.

Vamos metios na biesca, la humedá fai surxir los primeros goterones de sudor. Cuando los claros del monte lo permiten güeyamos el Tiatordos, paez que nos ta vixilando.

Enseguía llegamos a La Llongar (1100), seguimos darreu hasta'l colláu Pandevilla (1360) afayaizu llugar pa recobrar el resuellu sobre la tupía campera.

El sol calienta perbién, agradiezse el volver metese na solombra la biesca, seguimos camín del sol, llegamos al Colláu Llagu (1534), hay abondo cabanes esfarrapaes pola verde campera.

Tamos xusto debaxo'l picu, Juan Carlos y Bernardo tiren de frente, el restu la expedición garramos un senderu que sal pola drecha.

Tras pasar por un tunel d'escobes, polo menos daben solombra, toca subir por un pedreru, col calor asfixiante y chando agua por tolos poros, xiramos a la manzorga y comencipía a danos la brisina, tamos a un pasu del cumal.

Ya tamos na picorota del Maciedome (1908), Juan Carlos y Bernardo llegarón primero, de xuru que dalguna trampa ficierón.
Lo primero tirar les mochiles, como pesen les condenaes, sacar el agua, secar el sudor y... como se agradiez la brisa.

Les vistes son vistoses, joder cola redundancia, pa tolos puntos cardinales ¿son cuatro?, bueno digamos palos 360º.
Después dun buen montón de semeyes colamos por onde vinimos, el descensu faise llargu y pesau.

De nuevo nel Colláu Llagu, desta vegada tiramos pala drecha, damos cuna bona fonte, l'agua fresca ye de lo meyor cuando hay sede. Seguimos baxando pola pindía campera hasta'l Mayáu Recuencu (1340)

Pasamos a la vera dun horripilante refuxiu de cazaores, y xintamos al lláu d'otra bona fonte, a la solombra duna cabana, reconfortaos nel pensamientu que "nun quea na por subir".

Vamos nuevamente pola solombra la biesca, tamos pola zona conocía como La Cuchiella, pasamos por una portiella que da pasu a la Foz del Congostín, d'aquí salimos ya a un amplíu camín que nos dexa'n Pendones.

Enantes pasamos pelos Valliquinos, onde güeyamos a unos paisanos nel noble arte de recoxer la yerba.

Dexamos una poca d'agua na fonte del pueblu, no la escosamos nosotros.
Son les 17.00, en poco más de 7 hores caleyamos 16,2 km y un desnivel de 1128 m.

Paramos en Campu Casu a mercar suspiros, si, si, tamién a tomar una cerveza, nosotros nun dexamos al pueblu ensin cerveza, nun fuimos nosotros.
Son les 19.15 cuando dexo'l coche nel garaxe, una ducha y pa Xixón a dar de pasu una sidrería.

22-07-2008 Cortes

SOTRES-CANAL DE LAS GRAJAS-PRAU CORTES-PICU CORTES-CANAL COVARONES-SOTRES

A les 7.00 en Uvieu recoxo a Bernardo y a Juan Carlos, en Villaviciosa tan Paco y Riestra, tras tomar café y mercar el pan tiramos pa Sotres, aparcamos los coches na Curvona (950), son les 9.30 y la mañana ta fresca y soleá.

Pola polvorienta pista pasennos unos cuantos taxis enllenos de turistes de zapatos y ¿corbata? vamos remontando el valle del ríu Duje, pasando a tierres cantabres, na Llomba del Toru (1300) dase por acabau esti paseu.

Abandonamos la pista xirando a la manzorga, val más non llevantar la cabeza del suelu si se va seguir. Llevamos ya un buen ratu subiendo pola campera por llamalo dalguna manera, ya tenemos enfocá la canal de las Grajas, seguimos porque sabemos que tien salía, a la vista non paez posible.

Esguilamos arrimaos a la drecha, un delos motivos ye dir pola solombra, otru l'agarrase a la paré, dar un pasu y baxar dos, bueno no que ya jode bastante al revés, les piedres son les que no vuelven a subir.

Después de 3 hores poemos salir desta canal, xiramos a la drecha, el suelu ye firme ¡ya non se mueve! llegamos al prau Cortés (2214) -to ye relativo- en placenturu paseu, algamamos el cumal del Prau Cortés (2286).

Tamos un buen ratu nesta cume, cola disculpa deles vistes, acoxonantes, pero acoxonante de verdá, ¿y agora, por onde se baxa?

Tenemos de frente Aliva y Peña Vieja, los urrieles... a la espalda el Cortés que bién podía quear pa otra vegada...
Paco intenta por tolos medios desfacese del botiquín que trai, debe tenelo to caducao, aguantamos ensín necesida de char mano del dichosu botiquín .

Vamos baxando, les fuercíes danse por recuperaes, danse pero no tan, anueche fue'l carmín na Pola. Nel prau Cortés xiramos a la drecha y pal Picu Cortés, anque el deseu fuera baxar la hora temprana (14.30) y el día pistonudo non dexaben llugar a dudíes.

Baxamos un buen cachu agarrandose a les piedres, pero ensín pelligru ningún, en 45 minutos empicotamonos nel picu Cortés (2371), el sol aprieta, notase cuando dexa de soplar la brisa.

Xintamos na solombra la pena, dalgunos... nun hay solombra pa tantos.
Recuperaes les fuercíes llega la hora de baxar, tomenlo con ganes, Riestra y yo paramos a tiempu, los demás tienen que volver a subir un buen cachu, no quiero pensar lo que pensaría si tuviera nesa situación.

Destrepamos unos metros p'algamar la canal de Covarones, llarga, llarga, llaaaaarga y pesá canal, ente la calor, les piedres que baxen roando y los pies que ya no se llevanten el final vese lexos, ca vez más lexos.

A la salía la canal un mastin lladranos con poques ganes, ya pue morder bien si quier que demos la vuelta.

Ya na pista, que llarga paez a estes hores y eso que ye p'abaxo, entramos de nuevu nel paraisu, anque pol calor que fai bien paez el infiernu. Nos invernales de Sotres el filín d'agua qu'hecha la fuente ye bastante pa refrescanos por dientro y por fuera.

Na Curvona de Sotres, últimu repechu pa alleganos al polvorientu coche y ¡milagru! taba na solombra. Son les 19.00 y tiramos pa Tielve con dos unicos pensamientos... primero ocupar el sitiu les llecheres na fuente del pueblu, eso ficimos tubimos un buen ratu en remoyu y segundo, dempués de camudaos remoyanos por dientro, tamién lo ficimos.

Llegamos a casa a les 21.15 tras caleyar durante 9 hores y subir un desnivel de 1467 m.