lunes, 21 de enero de 2008

21-01-2008 Renorios

MOREA-MOROS-SALMERON-CURRIECHOS-LA ESPINA-RENORIOS-L.LEVINCO
Tras recoxer a Riestra a les 8.24 na estación, el tren suel ser puntual, enpobinámonos pa Uviéu onde recoxemos a Bernardo y a Juan Carlos, la siguiente parada ye Morea d'Ayer onde desayunamos tranquilamente, igual ye porque no nos atopamos cola Benemérita.
Salimos de Morea (300) a les 9.50 direición Güería crucíando'l ríu Ayer pol puente colgante. Ensín tiempu pa pensalo ya tamos sudando, ta pindío, casi en vertical algamamos el primer cumal no sin antes rodiar les enormes antenes y güeyar les enormes vistes, tamos nel Picu Moros (712).
Tamos enriba la xuntura de dos valles, a la manzorga el valle del Ríu Ayer, a la drecha el valle del Ríu Nigru.
Si güeyamos a nuesa espalda tenemos el resultáu, la xuntura delos dos ríos formen el valle del Ríu Caudal, cerráu a lo fondero pola sierra del Aramo.
Volvamos a nueses andances y dexemos les lleciones de geografía pa quien te capacitáu pa dales.
Güei tamos recorriendo to esti cordal, les veces que recorri estos valles y lo cómodu que siempre fui, en tren o en autobús, como no en coche tamién. Esta vegada ye más paecío, poles vistes que no pola comodidá a dir n'avión.
Empicotámonos nel Picu Salmerón (814) onde incomodamos a un corciu que sal fuxendo. La baxada, más que mala ye incomoda, enllena d'argomes.
Pasamos por la Vega Chago y encaramámonos nel Picu Curriechos (1033) baxamos a la braña onde un perrucu con ganes de xuerga siguenos durante un buen trechu.
Alcordances infantiles, durmiendo na tená, zascandiliando to'l día colos primos, dando más que quitando-yos trabayu a mios tíos y güelos...
Coxemos una bona pista, abandonamosla poco después, ye necesario pa poer algamar el siguiente cumal, el nomáu Picu Espina (1172).
El sol calienta asgaya, nes semeyes pue vese, paez que tamos na seronda pero no, tamos en xineru.
Tamos en busca d'agua, poques fuentes por aquí arriba, les mines a cielu abiertu acabarón con to, pese a la rexenaración paisaxística llevá a cabu...el agua esfumose.
Alcontríamos un buen fontán...les vaques que baxen a beber al ríu.
Ya tamos nel últimu picu de la xornada, el que teníamos previstu facer, les enormes antenes del Picu Renorios (1197) ficieronnos to'l día de faro, lo lexos que les veíamos y equí tan.
Xintamos al sol, recostíaos na pare d'un casetón guardian deles antenones (to ye desproporcionao). Les vistes son impresionantes pese a la calima.
Tiramonos p'abaxo polos antigüos caminos, pasamos por Beyo casi ensín enteranos, tenemos priesa, ye que vamos pal tren...Camudámonos nel apeaderu de L.levinco, casi a medies subimos al tren deles 17.20, dexanos en Morea, onde ya, seliquinamente refrescamos abondamente'l gargüelu -ye una tradición- enantes de coxer el coche.
Caleyamos 7 hores y media baxo'l sol, no calentaba muncho la verdá, unos 18º, pola tarde metiose un poco la calima.

viernes, 18 de enero de 2008

18-01-2008 Ruta Les Fuentes

MOREA-MURIAS-SANTIBANES DE MURIAS
A les 8.24 recoxo a Riestra na estación del tren, empobinamonos pa Morea onde nos reciben con lluces y sirenes.
Ye la Benemérita que vien detrás de nos montando un buen escandalu, ¡yeramos nosotros los perseguios! parennos en mitá del pueblu, como había poca xente (día de mercáu) y tan acostumbraos a les persecuciones policiales naide facía casu a la escena. Tras un breve intercambiu de pareceres, ellos aseguraben que había pasao'l semáforu en roxo y yo xuraba que non, dexennos colar, con regañina pero dexennos en llibertá.

Ya ensín el ruíu deles sirenes entamamos la marcha. Crucíamos la carretera y subimos hasta Güería, ya coxemos el camín pasando pol caseríu de Pedreo (370).
En Pasauriu falamos con un paisanu que nos indica onde tamos satamente, subimos pola carretera hasta Güertomuru (430), seguimos p'alantre hacía'l Cabanón (480) retrocediendo un poco pa visitar el abandonáu caserio de Eros, finando nun grupu de cuadres nomáu Los Corros (530).
En Arnizu (550) salnos al pasu un mastín que nos atrona durante un buen trechu rompiendo el máxicu silenciu del paraxe, lladrá por obligación ensin ganes, paez más cansau que nosotros.
En pasando La Escrita ya güeyamos Murias (600) onde apaecemos pasando por delantré deles antigües escueles.
El día soleáu y demasiao calurosu pala época'l añu que tamos, pasamos delantré la casa de mio güela (matriarcal sociedá) faló con mio primu Xuan, entovía non se lo que puo pensar al veme caleyando por allí.
Baxamos pol medíu'l pueblu, deberíamos seguir de frente, pero teníemos intención de dexalos ensín agua, la sede apretaba y merecía la pena perder unos metros pa refrescar el gargüelu.
Subimos unos metros pola carretera, ensegüía la dexamos, vase mexor pol camín, además fai solombra.
Enseguía la volvemos a crucíar, direición Vil.lar (730) afayaizu y soleyeru pueblín con cases arreglaes y una prestosa capiella. Un cartelón danos dos posibilidaes de algamar Santibanes, pola drecha 15 minutos, a la manzorga 6o. En Santibanes (715) damos buena cuenta dela fuente pública, xintamos seliquinamente esperando que salga la Línea de les 15.10.
Baxamonos en Güería pa facer el cachu camín que nos faltaba, crucíamos el ríu pol siempre prestosu puente colgante.
Asina ficimos esta ruta de poco desnivel, que discurre a media fastera polos senderos del valle del empozáu Ríu Nigru.
Acompaño'l tiempu, secu y soleáu, unos 18º.