21-06-2009 Nogales

FIELATU-OSU-NOGALES-XEXE-CABRITERA-FELECHOSA

En Felechosa a les 9.30 xuntomé con Josito,Gelu,Victor,Carlos,Ana B, Ana P, Queco y David que ye la primera vegada que vien con nos. Ponemonos en marcha hasta'l Fielatu (1200) onde dexamos los coches, el día soleáu y un poco frescu, ideal ideaal palo que nos vien encima.

Ni que dicir tien que ye to píndio, vamos crucíando regatos salvaos por guardarrailes, que bonos pontes faen. Nel mayáu'l Alba un par de mastines dannos la bienvenía, por fortuna pa nos faen buenu'l refrán "munchu lladrar poco morder" el monte ta enllenu de ganao, más caballos que vaques, lo que da que pensar sobre el valor d'una vaca hoy en día.

Topamos de frente con dálgun ganaderu y pola espalda adelantennos tres descamisaos que van faciendo casi la misma ruta que nos.
Nel colláu Nogales (1919) la brisa obliganos a ponenos algo d'abrigu. De frente güeyamos el Puertu Vegará y tolos picos que lu vixilen.

Anque a desman vamos hasta'l picu'l Osu (2022) faennos les semeyes, vamos nomalos retratistas oficiales, los mesmos que fai unos díes nel picu Cuchu, quieren facer más de 75 cumes de más de 1500 m. pal torneu dela federación.Baxamos nuevamente al colláu coxendo carrerilla pa subir al Nogales (2074) pero ná, no sirvió pa ná. Queco queó trabáu no mas ancho'l camín, intentamos chai un gavitú, lo mexor fue dexalú'n paz mientrés xintabamos un bocadín, cuando nos dimos cuenta taba a nosa vera.

Baxamos pola crestería pa terminar empicotaos nel siguiente cumal, el picu Xexe (2064) una semeya y seguimos pola cresta, un pie en Lleón (el izquierdu) l'otru n'Asturies.

De repente güeyamos una cruz, p'allá colamos como si fuera nuesa última oportunidad, ye'l cumal dela Cabritera (1917).

Miramos y miramos pa tolos alreores, non quea ningún picu nel que atalayase, asina non nos queá más remediu que baxar pola píndia fastera, llarga y monotona baxada coles tripes ruxiendo.

Llego al fin al colláu Caniecha (1537) cola navaya na mano, la llargura deles uñes...acuerdome agora que ya tenía que habeles cortao.
Acabo faciendo'l bocadillu cola navaya tirao al sol nuna llastra, onde más calienta.

Na semeya d'encima el Retrinón, ¿será esti añu?

Tiramos valle Caniecha abaxo buscando y agradeciendo les poques sombres que hay.

Paecía que habíen marchao de vacaciones, pero allí tabén les Foces del Pino, estreches y oscures, que frío más rico.

En llegando al Molín de Peón, ¡sorpresa! un montón de meniskos y meniskinos habíense llegao al llugar pa facer pola sombra la ruta deles foces, si quieren sol van a la playa.

Vamos a polos coches, camudamonos de ropa y tras casi secar la fuente'l Fielatu, que bona y fría taba'l agua...paramos na playa fluvial de Yanos, una cerveza fresca y pa casa a la qu'entre pola puerta, sana costume, a les 21.10 dando por finá una agradable xornada montañera.

Caleyamos 17 km con un desnivel de 1050 m. nunes 7 hores, baxo un sol que pola tarde podía habese esforzao menos.

11-06-2009 Cabril

XINESTOSU-LOS CORROS-CHAU LOS GUES-COGOLLU-CABRIL-FANARRIONDA-CHANDURRIO

A les 7.00 colamos Paco y Yo dende Llugo, nel chigre de siempre al llau'l llagu poco enantes de llegar a Cangas tomamos el café, ya tan Bernardo, Juan Carlos y Manolo, enseguía lleguen Emilio, Eduardo, Alberto y Riestra, tras parar en Cangas a mercar el pan allegámonos a Xinestosu.
Si yeren poco les curves dela estrecha carretera entovía el sol de frente no mexoraba la conducción. Aparcamos al final del pueblu onde nos mandarón unos paisanos que diben a caballo.

El día presentase soleáu y calurosu, pantalones curtíos puestos y ropa d'abrigu y paragües al maleteru, pasa una parexa de vallisoletanos que va caleyar por estos andurriales.
Comencipíamos a caleyar, sin dexar de sentir en ningún momentu'l ruxir del agua, dexamos la ancha y tendía pista en más duna ocasión pa adelantar un puquitín, non tanto como un paisano que diba'n moto. Topamos pisaes d'osos, pol tamañu apostaría por una osa con esbardos, tan enmarcaes en sendes boñigues de vaca.

Nel collau deles Tres Llagunes (1726) ensin pensalo muncho tiramos a la manzorga, hay un buen trechu hasta empicotanos nel picu Corros (1925), refrescamos el gargüelu y facemos semeyes ensín sentíu, el Cuetu Arbás, el Cornón...

Juan Carlos, Bernardo y Paco ya vienen del Chanu los Gües (1922) nosotros arrancamos pallá. Desandamos el camín hasta el colláu Tres Llagunes, la siguiente parada tras abastecese d'agua nun regueru, el día non ye muy calurosu pero'l esfuerzu da sede, ye'l el colláu la Mochadina (1825).

La misma xugada, los tres d'anantes vuelven del Cogullu (1965) nosotros vamos agora, paez que temos enfadaos o ye que falta coordinación. Si nel Chanu los Gües abandononos Alberto desta tamién desistio Eduardo, ya son cinco los que tiren pal Cabril.

Nel Cogollu sentamonos un buen ratu, no vemos ningún osu, tamos encima del Llagu Bonu, área restrinxida de máximu nivel, facemosi semeyes, de momentu supongo que te permitío.

Coxemos carrerilla pa esguilar al picu Cabril (1919) xuntámonos todos, desta vegada naide escapó.
Baxamos al colláu Carbazosa onde xintamos bonamente, recuperamos fuercíes pa poer empícotanos en tolos promontorios que nesta zona delimiten Cangas de Somiéu.

Güeyamos el valle'l Pigüeña col Mocosu y la braña la Pornacal como actores principales, no dexamos de algamar cumes, les siguientes son la Fanarrionda (1884) y el Chandurriu (1872).

Finamos por tiranos monte abaxo por onde más cotolles había, menos mal que no son especie protexía, el camín ta esmolecíu, fai años que non pasa ni un alma. Llegamos con más pena que gloria a otru camín, estí ta bien conserváu, que nos dexa en Xinestosu.

Un buen fontán danos la bienvenía, agradecemoslo abondo anque un paisanu muestrase temerosu que-i acabemos col agua, comprendiolo cuando-i dicimos de onde venimos.

Al lláu'l coche pasa'l ríu, metemonos dientro, sino fuera pol agua que taba xelá...

Camudámonos de ropa y vuelta a refrescase, destá cola bebía oficial, cerveza con kas de limón.

Somos testigos del stres productu del mundu rural, les males pulgues d'un lugareñu, por facelu esperar apenes un minutu, visto d'otra manera fue amable, no paso col tractor por 'rriba los coches ni fue a casa a pola escopeta.

Mercamos el típicu quesu de Xinestosu, puntu redondu a esta andariega xornada, fuerón 16,5 km. con 1386 m. de desnivel, una cota máxima de 1965 m. fechos en 8 hores, si hay discrepancíes con estos datos les quexes a Garmin.

Llegue a casa a les 9 la nueche, teníendo en cuenta que había salío a les 7 la mañana pue decise que'l día fue completu.

07-06-2009 Palazana

TUIZA RIBA-MEICIN-FORQUETA'L PORTILLIN-CANALON OSCURU-PALAZANA-PRAU ALBU-FARIÑENTU-TUIZA RIBA Güey a les 8.00 recoxo a Riestra na estación de Llugo y a Juan Carlos n'Uvieu un poco más tarde, paramos en Mieres a tomar un café y tener un encontroníazu cola autoridad en forma de policía municipal, fue velu apaecer na moto y veles venir toes, la pinta chulesca y la actitud paternal por non dicir otra cosa, ta nun tris de multame pero prefier perdoname la vida.

Dexamos el coche nel ampliu aparcamientu de Tuiza Riba (1200) a mio nimíu entender otru sinsentíu dela administración, protexen el paisaxe fomentando'l turismu desaforaú: centru de interpretación postmodernu a media hora de refuxiu últimu gritu n'arquitetura... de momentu solo se pue llegar a pata...bueno volvíamos a lo nueso, fai frío y les ñubes tan bien agarraes a les cumes.
Llegamos al refuxiu (1550) y xiramos pala drecha, polo más pindio, pongo los guantes y non pongo el gorru porque lu dexé en casa. Facemos una paradina na Forqueta'l Portillín (2050) atáyanos un montañeru solitariu y ávidu de mostrar so conocencia montañera, nosotros seguimos palante, algamámonos nel Canalón Oscuru (2142) poniendo y recomponiendo dalgún jitu.

Agora vamos pola crestería subiendo y baxando picos, a saber el picu Palazana (2120), el Altu los Comisos (2078), el Prau Albu (2123) el Pie Ferreru (2069). La borrina ca vez ye más espesa.

Al Fariñentu (2176) ya llegamos a tientes, col paragües abiertu, el chubasqueru puestu... ya ye muy suave dicir que ta orpinando.
Nel picu ya non hay buzón, queén restos esparcíos y mezclíaos col belén de cumes, hay xente que-i molesta to, creénse na posesión dela verdá, güey sin dir más lexos si no lo conocíesemos non podríamos dicir onde tábamos, pero esos arrancabuzones de xuru que conocen el mundu mexor que a la so muyer (perdonai les feministes).

Baxamos ensin pausa, nun para d'orpinar, llegamos al llagu Turbiu, desta tien agua, pa tiranos como bales pol Boquerón pabaxo. Suben unos mozos que faen a la inversa la misma ruta, ya poemos cerrar los paragues y quitar los guantes.


En casi llegando a Tuiza d'Arriba paramonos a xintar, güeyando na fastera enfrente como los utres y dos mastines intenten xintar del mismu animal (ensin identificar), de momentu dexamos a los mastines ganando la partía.
Caleyamos 9 km. en 6,15 hores pa subir un desnivel de 1251 m. y una cota máxima de 2179 m.
Llegamos a casa con tiempu de sobra pa poer votar, cosa que quién quiso puo facer.