22-08-2009 Valdorria

COLLAU COTO-CANTU'L CHOZO-VALDORRIA-ALTU LA RASA-COLLAU COTO

Llegamos a Mieres Cundi, Juan Carlos y Paco, tamos col cafetín cuando asomen pola puerta Emilio y Riestra con dos nuevos fichajes, Juan y Josito.

Enseguía colamos pa Lleón al conocíu, tuvimos la selmana pasá, colláu Coto, oficialmente nomáu colláu Valdeteja (1372) dexamos los coches xusto nel mismu sitiu que fai 10 díes. Hay xente durmiendo en autocaravanes.

Desta vegada colamos pala drecha, son les 9.30, el día nidíu y calurosu, la pista ancha y polvorienta. Subimos a La Carba (1913).

Seguimos p'alantre, pasamos polos Tres Mojones pa baxar a la collá Bucioso (1765) onde un grupu chavales tan dandose baños de sol. Nosotros seguimos pola manzorga direición la Braña (1868).

Seguimos pola crestería hasta'l Cantu'l Chozu (1876) güeyando'l valle del Curueño y la planicie de Lleón, tan cerca, tan prestosa... y nosotros p'arriba y p'abaxo y vuelta p'arriba, colo güapo que se ve esa llanura que tenemos a tiru piedra. Tamién apetez tirar pal otru lláu, güeyamos tola cordillera y al fondu'l Espigüete onde dibemos dir güei.

Nun sinfin de sube-baxa tamos nel Portillo del Agua (1815) últimu escalón enantes dela desafiante y agora ya cercana Peña Valdorria (1923).
Diximos qu'a las tres nel picu y a les tres llegamos al cumal.

Vistes alloriantes pa tolos alredores, unos recoxen té otros xintamos, ya yera la hora, y sobre to bebemos con ganes, el calor aprieta, agradiecense perbien les raches d'aire.

Toca baxar del afayaizu picu, volvemos al Portillo del Agua, agora xiramos a la drecha pindia fastera abaxo hasta Espantagallinas (1650) onde'l lugareñu de turnu, tenía'l tractor volcáu, metenos na encerrona del día.

Fainos perder, a estes hores ya cansaos y con bastente sede, muncha altura en busca duna fuente onde non bebe ni el ganao, tamos en Brañarrionda (1515) seguimos p'alantre, güeyamos una bañera con agua abundante y un par de mastines que dicen que sigamos, no atienden a la teoría Zapatero, non dialoguen solo faen lladrar asina que un par de borrillazos y mastines tranquilizaos.

El agua taba pa facer el té qu'habíen recoxio, un poco más p'alantre otra fuente, esta sin perros y algo más fría. Subimos a la collá qu'el paisanu perxuró que daba a los coches.
200 m. de desnivel baxo'l alloriante sol.

Tamos nel colláu del Buey (1684) les vistes, un tupíu monte d'argomes xigantes, alloriantes, los pensamientos unificaos pal putu paisanu. Delos coches ni rastru, otru colláu más altu.

Ensin perder mucha altura, eso intentamos, comencipíamos la aventura nel piornal, vamos de frente al Altu la Rasa (1550) asustamos a un xabali que sal despavoríu marcandonos el camín, pero va muy apriesa ni siquiera Juan Carlos ye capaz de seguilu.

Baxamos como bonamente poemos apartando les cotoyes coles pates, hechu fácilmente demostratible, entovía tengo les marques que me faen encariñame col paisanu del trator, toi pensando dir ayudalu.

Finamos na carretera, un kilometru p'arriba col alquitrán derretio y la sesera recalentá.

Llegamos a los coches atayando por dalgún prau, llavamonos bonamente na fuente y tras unos bonos tragos d'agua vamos a polos llargos tragos de cerveza.

Asina nos dierón las 18.43, si descontamos 9 hores y 10 minutos que tuvimos en marcha verás qu'entamamos a caleyar a les 9.33, tiempu que nos dio pa empicotanos nel Valdorria (1960) subir un desnivel de 1365 m. y correr más que recorrer 19,7 km.

12-08-2009 Peña Castil

SOTRES-INVERNALES DE TORO-CAMBURERO-PEÑA CASTIL-VEGA TORTORIOS-PANDEBANO-INVERNALES DEL TEXU

Nun se como entamar esto.

Entamu 1.- Agradecevos el xestu, nel monte naide se quea solu con Josito, dan les 7.15 y allí solo ta él. "Tarden en llegar" "no solo vamos tu y yo" nun vi por onde escapar y eso que güeye bien toes les esquines.
Entamu 2.- Josito acabo cansáu, acabe con él, tardare un mes o dos en recuperame, gracies a que naide lo vio quién lo va creyer...
Vamos dexanos ya de tantos entamos y vamos meter les manes na masa... La culpa ye toa mio, elexí una deles propuestes de Victor, camudela un poco pa peor, podíemos haber dio a cualquier sitiu, media xornada, bona pitanza...pero no, fuimos a facer (posiblemente) la ruta más exigente fasta güei dela historia delos Meniskos.

Comencipíamos, esto siempre ye prestoso, desayunando en Arenas, el día non ta muy católicu pero confiamos nel home del tiempu. Tras dexar el coche na Curvona de Sotres (900), había xente durmiendo na misma pista, son les 9.15, el día ya ta nidiu, caleyamos pola pista, ca coche que pasa va dexandonos una capina de polvo enriba, son unos cuantos los que pasen.

Nos invernales de Toro (1050) dexamos la pista y la solombra, sacamos gorros, pañuelos, bastones, proteición solar, chamos un tragín d'agua...tiempu suficiente pa que nos pasen dos grupos en total 5 montañeros. Metemonos na agradable canal de Fresnedal, comencipía selemente como invitando a ello, ca vez se pon más pindía la condená, más estrecha, más "putes piedres".

Nel mayáu Fresnedal (1350) tiramos pala solombra, apetecía más, afectó negativamente al celebru, paez que vamos mal, una güeya al gps y unos bañistas que subíen al llagu Les Moñetes finarón de confirmalo, tabemos en casa dios, media vuelta y vuelta y media a poles gafes de Josito.
Fue lo único que caleyamos pa baxo y tenía que ser por ¡habenos equivocao!

El tarrén ca vez ta más pindio, si miramos p'atrás y superamos el vertigu les vistes son espetáculares. Nel mayáu Castil (1650) abundante agua, más alantre hecharemos-i toes les culpes. Siguiente repechu, agradiecense los falsos llanos, anque tengan un desnivel de más del 10%, si vos apetez comprobalo...

Llegar al mayáu Carbonal (1700), el ruxir del agua, el soníu los cencerros, el verde, el cielu azul, la brisina, nuna pallabra el paraisu, anque si llevantes la tiesta ves a les cabres lexos y más lexos a Josito tal paez el mismu infiernu peslláu por un enorme neveru.

El sufrimientu, ruxen les tripes y non de fame, un pasin p'alantre un minutu pa recuperar, ¿onde tan les fuercíes? maldita agua...

El Colláu Cambureru (2056) un güeyu a la canal de Fresnedal, fuerón 1000 metros de desnivel, solo la canal, aparte la propina deles Moñetes...

Les vistes...¿merez la pena'l esfuerzu? menuda entruga, güei dexame de pijaes, nun veo na, escapaseme la mirá pala manzorga una enorme mole de piedra y la conocencia que son 400 m. de desnivel lo que quea non invita al optimismu.

Encima dame por pensar... non subo, bastante tengo con llegar al coche, a mediá que voy arrastrandome fastera arriba solo voy pensando en dar la vuelta, non ayuda muncho que los xemelos intenten ponese polo menos a la altura los güevos.

Falo cuna parexa que baxa, si Josito asoma la tiesta digo-i que baxe, nin que me oyera, alli apaez la tiesta pero no-i dixe na.

Peña Castil (2444) atopamos a 4 montañeros más, tardo n'articular soníu, por fin los saludo, casi algamanos el Urriellu, Tiros Navarro, Peña Vieja, Cortés... un mundu de cumales a nuesu alredor.

Semeyes pa tolos llaos, los bañistes nas Moñetas... hora de xintar, un tragu yogurt, mediu piescu, nun entra na, más bien sal, ¡puta agua!
Fuxendo p'abaxo, menos de tres hores hasta'l coche.

Del Colláu Cambureru pola pasá delos Tortorios a la Vega los Tortorios(1900) un campamentu que resulto ser de espeologos, les oveyes que se-yos meten nes tiendes, un ratiquín falando.
Llegamos al mayáu Les Moñes (1870), ya nos asomamos a la canal deles Moñes, Pandebanu a vista páxaru.

Pandebanu a tope, enllenu de carros de paises llexanos... honda, toyota, renault, mercedes...queá un buen cachu que baxar pero vese ya con otros güeyos.
Vuelta a la pista vuelta a pasar carros de paises llexanos, les finines capes de polvo agora pegense mexor por mor de la capina sudor que nos rodea.

Nos Invernales del Texu (870) una bona fuente, llavamonos pies, manes, oreyes, narices... tragamos llitros d'agua. Camudaos de ropa, Josito acerco'l coche vamos en busca la fresca cerveza.
El día fue llargu y soleáu, entovía me rellucen los amariellos pelos deles manes, dos díes más como güei y poemos dedicanos a vender cd's poles cais.

Datos téunicos pa quién-i pete, 8 hores caleyando, 16.800 metros a lo llargo y 1.554 p'arriba, sol, poques nubes por non dicir ninguna, calor el xustu.

07-08-2009 Bodón

COLLAU COTO-COTO CABANAS-BODON-COLLAU VALVERDE-COLLAU COTO

A les 7.30 ya toi en Uvieu recoxendo a Juan Carlos y a Bernardo, en Mieres nel chigre de siempre esperamos a Alberto y a Riestra. Güei ye un desos díes qu'el tiempu nos fai emigrar. Recuperamos el antigu espíritu del Payares, camiones y más camiones imposibles d'adelantar pol tráficu intensu -¿será la crisis? eso que Zapatero quito'l peaxe, pusolu más arriba- pola borrina espesa, pol orbayu pertinaz.

Paramos en Villamanín, vense trocinos de cielu azul, decidimos tirar hasta'l colláu Valdeteja. Pescudamos el horizonte, pal frente pala drecha pala manzorga, p'atrás ni se nos ocurre. Decidío, equí vamos entamar la ruta.

Nel colláu Coto (1372), más allantré vos esplico'l nome, colamos a la manzorga, quién dixo miéu, de frente al mayor pareón que gueyamos, esguilamos polos Pedrosos y las Cinchas pa finar empicotaos nel Coto Cabanas (1904) rematáu pol curiosu, por curiosu y pola llatitud que tamos, horru que fai de buzón de cumes.

La borrina que dende abaxo paecía escaecer siente agora curiosidá por venos de cerca, non facemos buenes migues, tomalo a bien y cola pa otru lláu, no-i entrugamos pa onde.

Col camín despexáu colamos pola crestería p'alantre, nun sinfín de sube-baxa vamos Alberto y Yo dandoyos ca vez más ventaxa, tanta fue que casi nos perdemos, asomamonos a un pasu que no vimos con buenos güeyos, tuvimos un ratu buscando otro meyor, pa finar nel mismu sitiu.

Desta vegada si que tiramos p'abaxo, ayudonos Riestra que nos pegaba unos buenos glayíos, quisimos entendelos como indicaciones y no como insultos, asina que p'allá nos empobinamos.

Destá perdimos mucha altura, tabemos debaxo la inmensa mole del Picu Bodón (1957), ya fai ratu que nos esperen na cume, asina que a coxer aire y a esguilar, llegamos xusto cuando una parexa franceses daba por finá su estancia nel cumal.

El sol había ganao definitivamente la batalla, la brisina, el afayaizu llugar, les prestoses vistes, xunto col testón ruxir deles tripes fizonos tomar una decisión taxante, non había más remediu, había que sentase a xintar.

Llevonos un buen ratu, tras recoxelo to y curiar que non dexabemos na que pudiera delatar nuesa estancia nesi maxestuosu llugar y tras embadurnase de proteición solar colamos por mismu sitiu pol qu'habíemos llegao.

Algo diba mal pales cabres, taben berrando nel mismu sitiu que le vimos cuando subíemos.
Hacía la mitá la crestería, nel colláu Valverde (1700) tiramonos pola pindía fastera abaxo cola vista fixa nos coches, el sol y la sede facía velos ca vez más lexos.

El tarrén ca vez ye peor de caleyar, pasamos pol colláu Rabo (1550) y algamamos Fuecicalvo (1450) llugar ocupáu por un casetón y una antenona, y onde el tarrén ya se fai más sociable.

Ya tamos xunto a los coches, hay una bona romería, camudamonos a la vera una bona fonte, el sol aprieta y un paisanu con ganes d'esplayase danos abondes esplicaciones...

1.- los llobos habíen escorrío a les cabres, consecuencia, taben enriscaes, había que descolgase con cuerdes, y a ser posible llegar enantes que los llobos.
2.- El nome Colláu Valdeteja no ye del agradu delos habitantes de Genicera, resultáu cartel polos suelos.
Lleición d'hestoria: nos tiempos delos años del 1300 los habitantes delos Argüellos (las tres Tercias) facíen Conceyu Abiertu nesti colláu nomáu d'aquella Colláu Coto, asina que así sea.

Ya to listo, la romería yera pa ver pasar la Vuelta Ciclista a Lleón, quisimos adelantanos y llegar a la civilización, representa nesos momentos por un pueblu con chigre, pero la Benemérita dexonos aparcaos na cuneta más d'una hora viendo pasar ciclistas. Una vez despexá la carretera ya encontríamos camín de Carmenes onde refrescar el gargüelu.

Asina casi ensin querer entretuvimonos 7 hores pa subir un desniveel de 1389 m. y recorrer 10,75 km.
Acercase al Payares y pese a la espesa borrina pudimos ver que no orbayaba, agora llovía con fuercía.