miércoles, 29 de julio de 2009

29-07-2009 La Molina

LA MOLINA-BRAÑES-BERODIA-INGUANZU
Bernardo, Juan Carlos y Manolo pasén a recoxeme, anque ya amanecio fai ratu entovía ye muy tempranu, son les 7 la mañana. En Villaviciosa tan esperando Emilio, Alberto y Riestra. Camudarón de personal na cafetería, pero estes van durar poco, xubilaranse enantes desti inviernu.
Dexamos los coches poco enantes del cabraliegu pueblu de La Molina (425) ta despexao y la temperatura ta dexando de ser fresca, el murallón que güeyamos frente a nos paez una pesadilla, fai apetecer volver pala cama.
Son les 9.15, atraviesamos les estreches caleyes en busca del Ríu Casañu, nel Puente Pompedru (350) crucíamoslu, perdimos altor que comencipíamos a recuperar pola cuesta Pandu p'arriba hasta'l colláu Pandu (480).
Emilio y Manolo non apaecen, llamamolos a voces y na, solo oyemos los glayíos que nos devuelve'l eco. Empecipíamos a preocupanos, la borrina vien a nuesa escontra, finalmente oyennos y dan la vuelta, habíen pasau de llargo.
En Brañes (720) danos alcance una pastora que va hasta Cabezu Llerosos a güeyar el ganao, diz "a buen pasu quedenvos dos hores" Tamos atapecíos pola borrina, non sabemos que facer.
Seguimos darréu ganando altor, la temperatura ya baxó bastante, ye bona pa caleyar, nel Campiñon (820) volvemos parar y volvemos decidir tirar p'arriba, desta vegada allegamonos a Brañes (1080) entrugamos-y a un pastor que no yera pastor, resulto ser un colgáu que taba durmiendo la mañana.
Ente los aterraores mugios delo que resultó ser un enorme güe que pese a tar a nuesa vera non yeramos a güeyar -non se güeyaba un burru a tres pasos- decidimos, desta si, volver sobre nuesos pasos dexando El Jascal y el Cabezu Llerosos pa mexor ocasión.
Baxamos ente tiniebles hasta El Coterón y d'aquí camudar el destín. Xiramos a la drecha direición Berodia, guapu y afayaizu pueblu cabraliegu, la borrina no osa seguir nuesos pasos y el sol ta faciendo asomar con más frecuencia de la aconseyable los goterones de sudor.
Si la subida fue casi toa ente los felechos y les siempre afayaices cabarres, aderezá con dalguna que otra picáura de tábanu -entovía toi rascandome mientrés lo escribo- na baxada y nel restu la ruta el paisaxe no camudó.
Vamos pasando poles Conches, la Cotera Pierdón, los Gavilanes (720) las Mazucas... Sentamonos a xintar baxo la solombra duna bona cuadra. Llevantámonos col sol calentando como en sos meyores tiempos, les cabanes bien arreglaes dicennos que por esti buen camín suben los toterren.
Entrugamos-y a un paisanu si se pue cruciar el ríu pa alleganos a La Molina, diznos por onde cai'l puente, entrugamos-y tamién si hay taxista en Berodia, casualidaes dela vida, diznos que ye'l so fiu.
A Berodia como dixe enantes guapu pueblu y agora soleáu, faltai daqué pa nestos momentos ser afayaizu ¡non tien chigre! eso si, dimos bona cuenta de la fuente d'agua. Esta imprevista dificultá fue suficiente pa de nuevu camudar de rumbu, enteraos qu'en Inguanzu si hay chigre enfotaos salimos pol antigüu camín, bien anchu y ensin sombra dalguna.
Ya en Inguanzu tras pasar a la vera la ilesia metemonos d'avezu nel chigre, tras refrescanos bien por dientro llamamos al taxista.
Dexonos a la vera'l coche, onde nos camudamos de ropa, entovía los picos tan tapecíos pola borrina, con animos renovaos volvemos a parar poco enantes de Posada de Llanes. Ya col gargüelu bien frescu tiramos direutos pa casa.
Son les 20.00 cuando me dexen en Llugo y anque fai sol tamién fai un airín cabrón.
Fuerón 15 km. con 1006 m. de desnivel de subía, ficimoslo too en 7 hores y media.
Queámos convocaos pal vienres 7, el destinu, eso ya ye otru cantar casi tan impredicible como'l tiempu metereolóxicu.

sábado, 18 de julio de 2009

18-07-2009 Requexón

PANDECARME-VEGARREONDA-REQUEXON-TORRE LUEJE-PANDECARME
Güey madrugamos, somos pocos, a les 7.15 partimos de Xixón, nun coche Victor,Josito y Jordi n'otru Jorge,Ana P y Cundi, desayunamos en Cangues d'Onis, colamos enantes de que se llevantara'l panaderu.
La carretera delos Llagos ta despexada, dexamos los coches en Pandecarme (1088), el día ta nidíu, la temperatura ye bona, los chubasqueros van cayendo al maleteru, les mochiles van llenes...d'agua.
Tamos ya mentalmente preparaos, gorros, agua, protetor solar... Son les 9.15, vamos dexando atrás el Pozu'l Alemán, Vega la Piedra, la Vega Canrasu, La Rondiella... nuna hora tamos nel refuxiu vieyu (de Vegarreonda). Refrescamos el gargüelu, dalgunos rellenen la cantimplora, hay miéu a quease ensin agua.
Agora'l cielu va tornandose gris, xunto col airín frescu faínos alcordanos dela ropa d'abrigu que dexamos nos carros.
Seguimos p'alantré coles mochiles enllenes d'agua, un pastor ta baxando deles altures les sos vaques. Crucíamos varios neveros, en plenu mes de xunetu seguimos pisando nieve.
Na Llampa Cimera xiramos a la mandrecha, vamos enclastraos ente moles de piedra.
Güeyando p'atrás vemos la costa, envidía sana, paez que fai buen día, frente a nos el Requexón, escrutamos la manera de empicotanos nesa mole caliza, desta vegada fuimos tos más drechos que Josito y claro ta, equivocamonos, na montaña casi nunca la llínea recta ye'l camín más curtíu.
Cuando atayamos a Josito ya llevamos un buen trechu esguilando, topamos un perru atau a les piedres, seguimos esguilando agarraos coles manes y los pies. Nel cumal del Requexón (2170) encontríamos a los dueños del perru y a otru montañeru, faennos unes semeyes.
Tamos un buen ratu nel cumal cola esperanza que escaezca la borrina pero son solo amagos, tienlo to atapecío.
Baxamos seliquinamente, ye un poco más complicao que subir y eso que non se ve'l fondu atapecíu pola borrina.
Nel mismu sitiu que dexamos les mochiles sentamonos a xintar, ensin pedinos permisu xuntósenos el orbayu.
Baxamos pol colláu les Merines, llugar pol que teníamos qu'haber subío. De nuevu na Llampa Cimera dudíamos (Jorge y Ana tirarón pal refuxiu) la climatoloxía invitaba a marchar, la temprana hora a seguir.
Xusto encima la picorota, los Argaos tan tentándonos, de momentu hasta'l colláu la Fragua, Jordi presientelo, si nos asomamos al colláu terminamos nel picu.
Un buen rebañu de rebezos mirennos extrañaos, tan a escasos 10 metros.
Dalgo falla na ñatura, ellos tiren pa' baxo nosotros p'arriba.
Algamamos el cumal nomáu Torre Lueje (2042), dexó d'orpinar, agora llueve con fuercía, una semeya y pa baxo fuxendo como fleches.
Dexa de llover, pero la cámara retratar ya ta empaquetá na mochila, acercamonos al refuxiu a tomar una cocacola, agora ye to pa baxo, faise un poco pesao cola llata coca vacía ente les manes. A les 17.15 llegamos al coche acompañaos pola borrina y el orpín nun día que se presaxiaba calurosu y despexáu.
Camudámonos de ropa y tiramos hasta Cangues, güele a gloria, un golor misteriosu que va y bien, enfotámonos n'averiguar so orixen, helau requemau (ya ye raro, un helau caliente, asina fue la xornada, frío,calor,sol,agua) degustámoslu con fruición, equí fai sol y calienta perbién.
Trás el helau unes botellines de sidra y pa casa, llegamos pasaes les 9.
Caleyamos 15,9 km. en 8.40 hores un desnivel acumuláu de 1409 m. cola cota máxima del Requexón -una vez puestos de pie tras dir tola ascensión arrastraos poles piedres- de 2170 m.

lunes, 6 de julio de 2009

06-07-2009 Cirbanal

ROBLEDO DE CALDAS-MAJADA AGUJAS-POZU FONTANALES-CIRBANAL-LA SILLA
Salimos de Llugo Paco y yo, pasamos por Uvieu a recoxer a Juan Carlos. En Mieres al golor del café apaecen Eduardo y Riestra.
Güei dibemos dir palos Picos d'Uropa, pero les ilóxiques previsiones meteorolóxiques solo dan bon tiempu pa'l 0ccideente, asina que tiramos pa Degaña, segun vamos subiendo'l Güerna vamos metiendonos en plenu inviernu, el sol vemoslu de refilón al pasar el Negrón.

Atravíesamos la Babía, a l'altura Villablino el cieulu non barrunta na bono. Ne'l altu'l puertu Degaña paramos delantré'l cartel d'Asturies, danos miéu entrar, el panorama ye muy negru. Facemos una xunta, no nos vemos por mor dela borrina pero oyer oyemonos, la temperatura ye de 9º, muy curtía palos mios curtíos pantalones.

Desfacemos parte delos 130 km. que llevabemos recorríos, topamonos cola trashumancia, un buen rato (lo que dura un semáforu en roxo, o mexor en verde, quea más ecoloxista) viendo pasar oveyes y mastines. Finamos en Rebollar de Caldas, fai sol, la temperatura ta bonible unos 16º.
Comincipíamos a caleyar pola pista, ganamos altor con rapidez, llegamos al colláu (?) onde hay una cabana refuxiu, seguimos pola campera, tras pasar una portiella llegamos al pozu Fontanales.
Metémonos dientro, ye una sima per afayaiza, sobre to si fuera ta malo o demasiao bueno. Unos maeros faen de escalones, si nos acostumbramos a la escuridad vemos una fuente al final, si no nos acostumbramos a la escuridad seguro que enantes de moyanos ya nos dimos unos bonos coscorrones.
De nuevu a la lluz del sol (ye una metáfora) seguimos ganando altor comodamente.
Al llegar al puertu'l Cubil facemos una paradina, agachamonos pa ver si despistamos a la borrina, nun nos ve, va demasiao apriesa y pasa de llargu, déxanos a la vista la cume del picu Cirbanal (2077), p'allá vamos, güeyaes fantasmagoriques pola borrina que atapez y desatapez a su antoxu los cumales y el embalse de Barrios de Lluna.
Tras un breve piscolabis y remoxar el gargüelu, seguimos pola cresta hasta'l siguiente oxetivu, el picu la Silla (2069). Dende aquí baxamos pola fastera, como dixo'l poeta faciendo la caleya'l al caleyar hasta'l pozu Fontanales, no ensín enantes espantar un bon rebañu de rebezos, más de 60.
D'aquí al refuxiu -una cabana bien llimpía y acondicioná- nel colláu (?) onde xintamos sentaos na mesa como señores, eso si barrimosla, barriola Paco enantes de colar.
Llevantose'l aire, xunto al frío, la borrina y les poques ganes, vaya cúmulu de desgracies, bastantes pa dexar los picos delos alreores pa otra xornada.
Llegamos al coche, enantes falamos colos paisanos na fuente'l pueblu entre tragu y tragu d'agua, del cambiu climáticu y otres caxigalines.
Fuerón 13,1 km y 919 m. de desnivel en casi 7 hores por estes tierres dela comarca de las Caldas en tierres de Lleon, Castiella palos collacios.
Tras volver a pagar el peaxe, tomamos una cerveza en Mieres y pa casa, llegamos a les 19.30...medíu día fuera casa.
Debimos ser delos pocos que güei güeyamos el sol por estes tierres norteñes.