09-04-2010 Tresvisu

SAN ESTEBAN-PICAYOS-TRESVISU-CANAL REÑINUEVU-URDON

Na Corredoria tan Felix y Adolfo, son les 7:45 y nun apaez naide más, en Colunga, de la comitiva de Xixón solo apaez Pedro. Enantes de cruciar la frontera paramos a tomar un cafetín.

Dexamos un coche en Udrón y subimos a San Esteban de Cuñaba (280), tras coyer agua asgaya plantámonos delantre los cartelos orientativos, nún, ta escrito 3 hores y media, nel otru 4. Son les 10:30 y ya tamos paraos nel mirador.

Baxamos unos metros pa cruciar pela pequeñina y encantá area recreativa, el muxu, les fayes, l'agua corretiando pente les piedres... la poesía da pasu al sudor. Tamos pol monte Robicores y el senderu anque paezca imposible empínase vez más.

Tras esguilar pela Canal de Les Texuques llegamos a la Canal del Infiernu, hay cable p'agarrase pero pa mi gustu quearón un poco escasos, vamos con cuidadín que un pasu mal dau son unos cientos de metros a lo fondero'l infiernu. Una güeya p'atrás y nun s'atisba'l fondu, asina que siguimos direición al azul cielu.

Algamamos el Colláu Cabreros (800), lo primero recobriar el resuellu, diez minutos dempués esfrutar del paisaxe, xintar daqué y facer abondo semeyes... el Desfilaeru la Ermida, un montón de picos, nin una ñube, estirando el pescuezu llogramos ver el Ríu Deva debaxo les chiruques.

Seguimos col caleyar, subiendo y baxando, entamen a apaecer cables fincaos na paré, unes vegaes muy necesarios, el ríu discurre 700 metros per debaxo y pues dar na oriella d'enfrente ensin coyer impulsu ningún, les más delles hay más pelligru con cualquier baldosa suelta na cai Corrida, pero yá que estan voi dexando la buelga en ca metru cable.

De frente nun se pue seguir, pa baxo como nun sea rodando... p'arriba unos tablones paecen los toriles de los sanfermines, ¿el serviciu de mantenimientu será bonu? ¿o finará daquién finando con tablón y too no fondero'l ríu?.

Nosotros a lo nueso, pal Cantu Morón, una vuelta otra revuelta y algamamos el mayor altor de güei, la H.orcadura'l Cantu (950) y empobinamos pal chigre ensin perder de vista'l caseríu de Tresvisu.

Son les 14:00, unes semeyes y pala solombra'l chigre, dexar les mochiles, retorcer el pañuelu, un llitru d'agua sal desi trapin... unes botellines de sidra y a la mesa, cabritu a preciu d'oro y el paisanu que tras entruganos sobre nuesos planes fainos empapizar cola so respuesta: nun vais llegar de día y de nueche nun llegais.

Danos abondes esplicaciones, ofreznos el teléfonu, llamá-yme si nun veis claru'l camín, muestranos abondo semeyes, incluso col dichosu google, eso si retrasíonos un cachu al insistir en cobranos la comida.

Baxamos fasta'l Riu Urdón a 430 m. pasando peles invernales de Llosa Cima, tardamos casi una hora en dar coles ñaples nun montón de cartelos; prohibiu'l pasu, zona pelligrosa, nun pasar... el mismu mensaxe con paecíes pallabres.

Crucíamos el Ríu pel Puente Bardina y pel muru de contención allantre vamos guardando'l equilibriu, cola manzorga bien preparada pa coyese del allambre que nos separtía del abilsu, y con más tientu ainda cuando nun s'afaya tal allambre.

Abandonamos la canal unes cuantes vegaes, la primera pela parte baxo, averaos a l'abandoná casa del guardia pa cruciar pel puente del Ríu Chicu.

La canal bien arribona, p'allá s'empobina'l camin, otra vegada a la canal, nun se cuantes veces la crucíamos, pero más de mil seguro, unes veces p'arriba y supongo qu'otres tantes p'abaxo.

Agora paecemos moninos, nun vamos peles rames pero si de troncu en troncu pa nun rodar llámbria abaxo, tamos en Piedres Negres, gracies a que hay poca agua pasamosla relativamente fácil. Y otra vez p'arriba.

Agora el cable paez que lu puso un xigante, voy col brazu llevantáu pa poer garrame, n'algunos llaos ta sueltu y quier chate fuera, pal derribaderu o pal canal, qu'entovía nun lo dixe, baxa llena y con bastante fuercía.

Tengo un especial recuerdu destos cien metros que vienen agora, como la idega de tornar al chigre nun val ya, hay qu'elexir; averase a la paré rascandola perbién col cuernu drechu mentanto un buen chorru d'agua va cayendote pel costazu o dir 10 cm. más p'afuera con un pie nel resbaliosu camín y l'otru nel aire col ríu 500 m. más abaxo.

Nun s'acaben les sensaciones, el corredor de Matallana, meyor güeyar les semeyes, unes lloses de formigón suxetaes al murallón pétreu por unes alambrines, que respigos solo de pensalo.
El senderu sal monte p'arriba hasta que-y da por baxar hasta la canal, metemonos pel Tunel Cantilucu, unes chapes faen de suelu, y de techu... d'algún coscorrón.

Ya voy cansaú y hasta los... de la... canal, nun m'alcuerdo si vamos perbaxo, perriba o nadando, unos atronaores berrios rompen el silenciu y nun dan ninguna tranquilidá.
La tradicional senda a Tresvisu, que ganes tenía de retratíala, pues nun hay manera, el contraluz, la borrina, mecagüen...

Un senderu tira p'arriba y otru p'abaxo, decidímonos pol que tira p'arriba, bien, salionos bien. Llegamos a la caseta, d'aqui vienen los bramios, nun nos tranquiliza muncho, paez una cafetera a puntu reventar.

Pese a lo afayaizo del llugar y ensin contar el chigre, ser l'únicu trozu llanu del día, fuximos escaleres abaxo nun vaya reventar esta vieya cafetera, y pela Canal d'Aileres algamamos la Central de Urdón (100).

Adolfo baxo corriendo pel pedregal, nosotros vamos más despacin mirando bien donde posar los recalquiaos pies, unes semeyes al ríu, agora ya tamos al mismu altor, y a recoyer el coche a San Esteban de Cuñaba. Menos mal que llevamos dos coches, son les 20:30.

Caleyamos 9 hores, una más paraos xintando nel chigre, ficimos 23 km. y 1325 m. d'ascensu... y dos conseyos, el primeru dir con un guante pa coyese al cable, onde lu haiga, y el segundu, llevar unos calzonciellos de repuestu... por si les mosques... que siempre van a la mierda.

Ye broma, dacuando hai que mitificar les coses, crear lleendes, como qu'el Madrid ye campeón d'Uropa.