30-06-2010 Valmartin

LA RAYA-COLLAU VENTANONA-TORRES-FUEYU-VENTANONA-VALMARTIN-LA RAYA

Salimos de casa con niebles matinales, ya en Mieres la cosa non meyora, facemos tiempu tomando el café, esperando a los de Xixón.

Ya nel Puertu San Isidro, dempués de pasar con exitu les obres del corredor del Ayer que se cai a cachos, como fadríen los romanos pa morrer ensin ver les sos obres nel suelu...

Aparcamos xusto na Raya (1500) frente al chigre, apenes les 10:00, el día nidiu y frescu, entamamos la marcha, van apaeciendo vaques al tiempu que separtamos piornos.

Enseguía damos cuna bona fonte, tamos a la vera'l Mayéu Torres, al pie de los picus Capiella, Valverde y del que paez dende aqui imposible d'algamar, el primer oxetivu del día, el Torres.

Colamos pa la drecha pa llegar al Collau Ventanona (1876), los güeyos vanse pa milenta cumales, como si los pocos que vamos a pisar güei nun sobraran pa fartucanos.

Agora vamos pa la manzorga, pasin a pasin vamos ganando altor, detiennos el buzón, Picu Torres 2104, pon.
Un ratiquín recobrando'l resuellu, más que ná pa que les semeyes nun salgan movíes, trepidaes nel llinguaxe técnicu.

Y tenemos mediu conceyu d'Ayer debaxo nuesos pies, y tamién un poco de Lleón, si ye verdá, voi facevos casu, de Casu tamién.

Entovía son les 12:00, damos-y a la parpayuela cunos montañeros y siguimos un ratu al sol, dexamos la tarxeta de cumales y baxamos per otra banda.
Enfilamos el Collau L'Almagrera (1845).

Les arandaneres, pequeñines pero resbalioses tórguennos el dir mirando pa los escaparates, desta manera escrutando perbien el suelu empericotamonos nel Fueyos (1891). Entovía nun ye la hora de xintar.

Güeyamos muy arribona el cumal del Torres, pal otru llau la Sierra del Corteguerón, dabaxo les Llagunes Caballuna y del Piornal.

Tras de consultar col mapa colamos pente les piedres y les cotoyes direción al Collau la Ventanona, dempués dunes semeyes col peculiar marcu algamamos el picu del mismu none, la Ventanona (1913).

Y al pol últimu finxu, ya lu güeyamos eso ye lo malo, ta entovía en ca dios.

Crestíamos tola cresta que coño vamos crestiar, p'arriba y p'abaxo y p'abaxo y p'arriba y vuelta a empezar... Finamos sentaos nel Collau la Forcadina'l Llagu (1785).

Equi Alberto niegase a subir, el resto empericotamonos nel Valmartin (1932) pa darreu baxar en busca d'Alberto y d'un afayaizu llugar onde ponese a xintar.

Coles fuerces repuestes seguimos p'abaxo ya ensin quitar el güeyu del coche, entramos nel chigre como si fuera la cocina de nuesa má... pa dar bona cuenta del refrixerante de gargüelos.

Ficimos 11 km. y 930 metros de desnivel en 6 hores y media.