11-9-2010 Peña Salón

VENTA GÜERA-VIBULI-PASA'L TOYU-PEÑA SALON-CASIELLES-PUENTE GÜERA

Magar almorzar en Cangues d'Onis colamos pel escobiu de los Beyos alantre hasta dexar los coches na Venta Güera (333).

Chamos a andar pela carretera qu'atraviesa la foz de los Andamios, diseñá pa que se crucíen dos motos ensin sidecar, eso si, l'asfaltu tá a estrenar.

Son les 9 y un rebañu comeyerbes empezuñaos (cabres) dannos la bienvenía, la temperatura que nin pintá, fuera de la foz paez que relluma'l sol.

Damos cunos madrileños que nos retraten, ellos diben facer barranquismu, nosotros que por ciertu semos Ana B, Ana P, Josito, Pilar y Cundi siguimos carretera arriba agora pela foz del Cándanu y l'asfaltu ya vieyu.

Entramos en Vibuli (750), tras rellenar les cantimplores siguimos pel formigón hasta onde charón la postrera palá, el cementeriu. Comencipíamos a separtar felechos y árgomes y a dalguna ortiga que se pon melosa.

Vamos camín del collau Baxeñu (1034), Peña Salón de frente, y unes families de rumanos allí pertrechaos, glayando nun sabemos el qué.

Sentámonos un ratiquín na campera rucando ablanes al tiempu que güeyamos l'horizonte, el Tiatordos, el cordal del Zorru, Peña Ten, Viegu... el verde la biesca y el blancu la caliza.

Escontra toles previsiones colamos pala manzorga de la peña, llegaos al collau tirámonos p'abaxo, nun tien munchu sentiu y siguenme a regañadientes, separtando ortigues y felechos, pindio p'abaxo primero y p'arriba de siguío, damos nuna covacha ensin salida.

Esguilando apegaos a la paré damos con otra cueva, esta si que tien lluz al otru lláu, tamos na Pasá'l Toyu (1050) solo nos queá subir pela pindia fastera que nos dexa na cumbrera de Peña Salón (1245).

Volvemos a oyer los glayios de los rumanos agora unos cientos de metros debaxo de nos, tamos un ratín sentáos al sol, ye hora dir buscando un llugar afayaizu pa ponese a xintar.

Na Boya Campiella (1194) sentaos nunos postes de la lluz, mascamos seliquinamente, elles cara'l sol qu'hai qu'aprovechar cualesquier rayu.
Col banduyu satisfechu vamos reblincando pel camín del Llaciu.

Ye lo que tienen les cotoyes y el dir con pantalones curtíos, faennos coyer más velocidad, tan rabioses estes cotoyes a falta d'agua paez que quieren sangre.
Ente vuelta y revuelta del camín algamamos Casielles (820).

A dalguna pruyía-y entrar a rezar na capiya, en duldándolo un ratu y nun atopando al santu pa roga-y que fixera sumir les cotoyes, camudamos de plan y baxamos pol asfaltu.

Agora si que podemos contar toles curves dende lo cinmero'l pueblu.

Dalguna ataye pa recobrar el contautu coles queríes cotoyes. Llegaos al puente la Sota (450) una güeya pal cielu, ¡dios de onde baxamos! cruciar el puente y desandar un poco la carretera desta mañana.

Na Venta Güeria tomamos una cerveza que nos supo a gloria, fuerón más qu'el día tuvo calurosu o quicias l'esfuerzu de subir 900 m. en 6 hores y media p'andar 15 km.